Гэтая патрыятычная акцыя на працягу ўжо многіх гадоў традыцыйна праводзіцца да Дня Канстытуцыі Рэспублікі Беларусь. Яна падкрэслівае значымасць такой важнай падзеі ў жыцці 14-гадовых падлеткаў, як атрыманне пашпарта грамадзяніна Беларусі і дапамагае маладым людзям усвядоміць, што быць грамадзянінам сваёй краіны – гэта не толькі гонар, але і вялікая адказнасць. Ва ўрачыстай абстаноўцы галоўны дакумент маладым людзям уручаюць прадстаўнікі выканаўчай і заканадаўчай улады, грамадскія дзеячы і заслужаныя людзі краіны.
Урачыстае мерапрыемства з нагоды Дня Канстытуцыі Рэспублікі Беларусь прайшло 12 сакавіка і ў Вялікабераставіцкай сярэдняй школе. Асабліва хвалюючым яно было для тых школьнікаў, якім напярэдадні споўнілася 14 гадоў і якія рыхтаваліся атрымаць пашпарты.
Намеснік старшыні Бераставіцкага райвыканкама Андрэй Шчука павіншаваў маладых людзей з гэтай значымай падзеяй у іх жыцці і адзначыў, што, атрымаўшы пашпарт, яны становяцца паўнапраўнымі грамадзянамі нашай краіны, з усімі вынікаючымі правамі і абавязкамі. Андрэй Іосіфавіч пажадаў юнакам і дзяўчатам разумець гэтую адказнасць і ганарыцца сваёй прыналежнасцю да грамадзянства Беларусі.
Далучылася да віншаванняў з гэтым святочным днём і інспектар групы па грамадзянству і міграцыі аддзела ўнутраных спраў райвыканкама Людміла Добка. Яна пажадала школьнікам заўсёды быць у згодзе з законам і ганарыцца тым, што яны з’яўляюцца грамадзянамі Рэспублікі Беларусь.
Андрэй Шчука і Людміла Добка ўручылі пашпарты грамадзян Рэспублікі Беларусь вучням Вялікабераставіцкай сярэдняй школы Мілене Кавальчук, Аляксею Рыгосіку і Паўлу Садоўскаму.
Са словамі віншаванняў да маладых людзей, якія атрымалі пашпарты, звярнулся і першы сакратар раённага камітэта БРСМ Ірына Вайцюк, якая пажадала ім з годнасцю несці званне грамадзяніна Рэспублікі Беларусь і быць сапраўднымі патрыётамі роднай краіны.
Традыцыйна ў рамках акцыі “Мы – грамадзяне Беларусі!” папаўняюцца рады Бераставіцкай раённай арганізацыі БРСМ , вось і ў гэты дзень Ірына Вайцюк уручыла маладзёжныя білеты БРСМ вучням Алекшыцкай сярэдняй школы.
Святочны настрой на працягу ўрачыстага меропрыемства стваралі канцэртныя нумары патрыятычнай тэматыкі, а напрыканцы ўвазе прысутных быў прадстаўлены відэафільм аб сацыяльна-эканамічным развіцці Бераставіцкага раёна.
Ірына МІКЛАШ, фота аўтара
