У навагоднія і калядныя дні кожнае дзіця чакае цудаў і казкі. На жаль, не ўсе бацькі маюць магчымасць выканаць запаветныя мары і жаданні сваіх дзяцей, асабліва гэта датычыць малазабяспечаных і няпоўных сем’яў. Аказаць падтрымку найменш абароненым катэгорыям дзяцей, якія маюць патрэбу ў клопаце і ўвазе грамадства і дзяржавы, прызвана рэспубліканская дабрачынная акцыя “Нашы дзеці”, якая ў гэтыя святочныя дні актыўна праходзіць у нашай краіне.
4 студзеня да акцыі далучыўся і калектыў рэдакцыі “Бераставіцкай газеты”. За сродкі прафсаюзнай арганізацыі нашай установы былі набыты навагоднія падарункі, з якімі галоўны рэдактар Зінаіда Самкова і прафарганізатар Алена Рыжко накіраваліся да сям’і Улейчык з аграгарадка Кватары, дзе выхоўваюцца трохгадовы Ягор і пяцігадовая Юля.
З вялікай радасцю і захапленнем дзеці прынялі падарункі, шчаслівыя ўсмешкі на іх тварах сведчылі аб тым, што і машынка, і лялька ім вельмі спадабаліся, а іх мама Алеся Яўгеньеўна выказала шчырую падзяку за аказаную ўвагу і клопат пра іх сям’ю.
Ірына МІКЛАШ, фота аўтара